Dìng Cóng
Chăng-kō̤ Mìng-dĕ̤ng-ngṳ̄ Háng-cê gì bēng-buōng. / 參考閩東語漢字其版本。
Dìng Cóng (陳俊, 881 nièng – 1324 nièng ?), cê Káik-mìng (克明), sê Hók-ciŭ Īng-tái gó-dā̤ gì siŏh ciáh miâng uăk gì iā dòng gì nè̤ng.
Dìng Cóng sê Hók-gióng Īng-gă-gâing (永嘉縣) săng-kṳ̆ Tŏng-ciòng-chŏng (湯泉村, gĭng-dáng Īng-tái Ngù-dùng-hiŏng Tŏng-diàng-chŏng 梧桐鄉湯埕村) nè̤ng, ĭ găk Dòng-dièu Dṳ̆ng-huò sĭng-tiū nièng (中和辛丑年, 881 nièng) chók-sié, Nguòng-dièu Tái-dêng gák-cṳ̄ nièng (泰定甲子年, 1324 nièng) sĕng-kó̤, uăk 443 huói, gó-chṳ̄ ké̤ṳk nè̤ng hô̤ lā̤ "Siēu Pàng-cū" (小彭祖).
Áng Mìng-guók chók-bēng gì «Īng-tái gâing-cé» (永泰縣誌) gì gōng-huák, Dìng Cóng nièng-lìng iā duâi lāu, mò̤ giāng-diê, gó-chṳ̄ iù chŏng lā̤ nè̤ng lùng lā̤ iōng. Dìng Cóng nièng-lìng muōng duâi sĭng-tā̤ muōng nâung, có̤i-cṳ̄ng biéng lā̤ gâe̤ng niè-giāng-giāng siŏh-iông duâi. Nè̤ng cêu kĕk dé̤ṳk có̤ siŏh ciáh dĕk duâi gì lài-lài, ciŏng ĭ ĕng diē-sié, dăng gáu chèng biĕng-dău, ciŏng-uâng nè̤ng â̤ sāi siŏh-bĕng có̤-chèng siŏh-bĕng ciéu-gó ĭ, gâe̤ng ĭ păng-gōng. Ĭ ngāi dŭ dâung ták kó̤, mò̤-niĕ-ài siĕu-huá siăh gì nó̤h, chŏng lā̤ iōng guó giāng gì nṳ̄-gái lùng lā̤ ché ĭ siăh-nĕng. Hiŏng-lī hiŏng-chĭng cêng-kó̤ cŏng-dê̤ṳng ĭ, gó ĭ Chái-lài-gŭng (菜籃公). Ĭ giàng-kó̤ ī-hâiu, hiŏng-lī ké̤ṳk ĭ diĕu siŏh ciáh chiông, ciŏng ciā chiông gâe̤ng ĭ gì gáuk-gáuk cà̤ ĕng diŏh Tŏng-ciòng-miêu (湯泉廟) diē-sié gé̤ṳng. Ĭ gì dâi-gié ké̤ṳk káik diŏh siŏh ciáh chà-bà̤ lā̤, ciā bà̤-bà̤ téng Nguòng-dièu tié-lāu bō̤-liù gáu Muāng-chĭng gì sèng-âu.