Uòng Hiêng-huàng
Uòng Hiêng-huàng (黃現璠, 1899 nièng 11 nguŏk 13 hô̤ – 1982 nièng 1 nguŏk 18 hô̤), nguòng-miàng Găng Gīng-ĭng (甘锦英), Guōng-să̤ Hók-chŭi (扶綏) nè̤ng, sê Dṳ̆ng-guók hiêng-dâi iā chók-miàng gì lĭk-sṳ̄ hŏk-gă, mìng-cŭk hŏk-gă gâe̤ng gáu-ṳ̆k-gă. iâ sê Cáung-cŭk tàu siŏh ciáh gáu-sêu, ké̤ṳk hâiu-sié nè̤ng cŏng-chĭng có̤ "Cáung-cŭk Lĭk-sṳ̄ cĭ Hô (父)". Ĭ găk 1936 nièng huák-biēu gì «Sáe̤ng-dâi tái hŏk-sĕng giú-guók ông-dông» (宋代太學生救國運動) sê Dṳ̆ng-guók dâ̤-ék-buô ngiēng-géu hŏk-sĕng ông-dông gì lĭk-sṳ̄ gì cṳ̆. Ĭ găk 1957 nièng huák-biēu gì «Cáung-cŭk Ciēng-sṳ̄» (壯族簡史) sê Dṳ̆ng-guók dâ̤-ék-buô ngiēng-géu Cáung-cŭk lĭk-sṳ̄ gì sṳ̄-cṳ̆ (史書).
Sĕng-bìng
[Siŭ-gāi | Gāi nguòng-mā]Uòng Hiêng-huàng siŏh-sié-nè̤ng gĭng-lĭk Chĭng-dièu, Báe̤k-iòng Céng-hū, Dṳ̆ng-huà Mìng-guók gâe̤ng Dṳ̆ng-huà Ìng-mìng Gê̤ṳng-huò-guók sé duâi sì-dâi, céng-giéng (證見) Dṳ̆ng-guók hiêng-dâi lĭk-sṳ̄ gì huák-diēng. 1899 nièng 11 nguŏk 13 hô̤ chók-sié diŏh Dṳ̆ng-guók Guōng-să̤-sēng. 1922 gáu 1926 nièng, Uòng Hiêng-huàng kó̤ Guōng-să̤ Dâ̤-săng Sṳ̆-huâng Hŏk-hâu tĕ̤k cṳ̆. 1926 nièng, găk Báe̤k-gĭng Sṳ̆-huâng Dâi-hŏk hŏk-sĭk lĭk-sṳ̄-hŏk gâe̤ng gáu-ṳ̆k-hŏk, sê Dò̤ Hĭ-séng (陶希聖) gâe̤ng Dìng Uòng (陳垣) gì hŏk-sĕng. 1932 nièng ĭ dáik diŏh lĭk-sṳ̄ gì hŏk-sê̤ṳ hŏk-ôi. Ī-hâiu, có̤ Báe̤k-gĭng Sṳ̆-huâng Dâi-hŏk gì Ngiēng-géu-iêng ngiēng-géu Dṳ̆ng-guók gì lĭk-sṳ̄. 1935 nièng dáik diŏh sĭk-sê̤ṳ hŏk-ôi, iù Báe̤k-gĭng Sṳ̆-huâng Dâi-hŏk bék-ngiĕk ī-hâiu, dè̤ng-siŏh-nièng 11 nguŏk ĭ gáu Nĭk-buōng liù-hŏk, găk Dĕ̤ng-gĭng Dá̤-guók Dâi-hŏk (hiêng-káik-sì hô̤ lā̤ Dĕ̤ng-gĭng Dâi-hŏk) có̤ dâi-hŏk-iêng, hŏk-sĭk Dĕ̤ng-iòng-sṳ̄ (東洋史) gâe̤ng Nĭk-buōng-sṳ̄, gá ĭ gì sĭng-săng ô Huò-dièng Chĭng (和田 清), Nguòng-dièng sé̤ṳk-ìng (原田淑人). 1937 nièng duōng Dṳ̆ng-guók, Uòng Hiêng-huàng bô găk Guōng-să̤ Dâi-hŏk, Dṳ̆ng-săng Dâi-hŏk, Gié-lìng Sṳ̆-huâng Hŏk-iêng, Guōng-să̤ Gáu-ṳ̆k Ngiēng-géu-sū, Guōng-să̤ Sṳ̆-huâng Hŏk-iêng (hiêng-káik-sì hô̤ lā̤ Guōng-să̤ Sṳ̆-huâng Dâi-hŏk) muōng gá-cṳ̆ muōng ngiēng-géu. Dṳ̆ng-huà Ìng-mìng Gê̤ṳng-huò-guók gióng-guók ī-hâiu, Uòng Hiêng-huàng dṳ̀ lā̤ nū-lĭk gá-cṳ̆ gâe̤ng ngiēng-géu, gó chăng-gă siâ-huôi uăk-dông, báik-cèng ké̤ṳk sōng có̤ Guōng-să̤-sēng Ìng-mìng Céng-hū Ūi-uòng-huôi Ūi-uòng, dâ̤ ék gái Ciòng-guók Ìng-dâi Dâi-biēu, dâ̤ ék gái Ciòng-guók Ìng-dâi Mìng-cŭk Ūi-uòng-huôi Ūi-uòng, dâ̤ ék gái Dṳ̆ng-iŏng Dó̤i-nguôi Ùng-huá Lièng-lò̤ Ūi-uòng-huôi Ūi-uòng gâ̤eng dâ̤ ngô gái Ciòng-guók Céng-hiĕk Ūi-uòng. 1982 nièng 1 nguŏk 18 hô, Uòng Hiêng-huàng ĭng bâng guó-sié ṳ̀ Guōng-să̤ Gié-lìng (桂林), hiōng-sêu 83 huói.